Shinggyim masha ni a prat hkrunlam a hpang chyahtum na pan-dung gaw gara kaw ta? Anhte gara shara kaw na yu hkrat wa nna, gara shara de bai wa na ga ta? Karai Kasang hpe teng sha hkap la kam sham nna, Karai Kasang ra ai hku hkan shatup let sak hkrum hkawm sa ai ni a matu gaw mahtai nga na re. Rai tim Karai Kasang hpe nkam sham ai,Karai Kasang hpe nhkap la ai ni a matu chyawm gaw grai htai yak ai ga san rai na re.
Lama nang mungkan ga na, Ja, gumhpraw sut su dik ai rai yang, ten shagu pyaw lu na kun? Ngai gaw nzawn nawn nngai. Matsan tim dai hte maren sha rai na re. Rai tim langai mi gaw nga ai. Na a prat hpe tsawra ai myit, masha wa a mara hpe mara raw dat ya lu ai myit, garum madi shadaw mayu ai myit ni hte gaw gap let ta tut jai lang hkawm sa na gaw grau mai kaja nga ai.
Daini na mungkan a shinggyim pinra hta hpaji gaw madung rai nga ai. Jawng ma prat hpe 20 ning jan grai pyaw ai hku lung lai wa ai hpang she, ngai chye wa ai gaw ndai mungkan hta hpaji langai hte sha gaw awng-dang ai lam ni lu na nre. Dakgasu jawng (university) lu lung ai gaw kaja ai raitim, dai kaw na hpaji hpe tinang gara hku hkaja sharin hkam la lu nna, dai hpaji, tinang a matu gade ram akyu rawng jai lang mai na she grau madung rai nga ai.
Shakut ai. Sanpoi (exams) awng ai hte nngut nga ai. Shani shagu jawng sa na hpaji sharin ai hte maren gaga shinggan hkan na manu dan ai hpa-rat ni hpe mung hkaja mai nga ai. Teng sha ra sharawng ai rai yang, nang hpaji lama mi hpe, shara ra kaw na kaja wa sharin hkam la lu na re.
Hpaji gaw ja gumhpraw tam na matu sha nrai nga ai. anhte a W/P Mungdan shing lam lu na hte grau grau na simsa ai de lahkam sa wa lu na matu mung garum madi shadaw ra nga ai.
Ngai grai na ga ai. Jawngma law malawng tsun chye ai, ndai hpaji (majors) gaw wawra hta grau kaja ai. Ndai she shang gumhpraw grau law lu na re. Computer science gaw Engineering hta grau akyu rawng ai. Ngai zawn nawn ai hpaji yawng gaw kaja ai hkrai rai na re. Madung gaw tinang hkaja taw ai hpe myit lawm ai hte sharin hkam la na she re. Ndai hpaji hpe ngai chye hkra, nlu nmai nsim nsa shakut ai myit bang na shakut ra ai.
Kalang lang tinang hpa myit lawm ai, hpa byin mayu ai ngu hpe dawdan na grai yak nga ai. Ya kan bau na matu galaw taw nga ai bungli hpe tinang kaja sha myit lawm na galaw ai ngu na ntsun lu ai. Dai majaw tinang a matu gara gaw grau grau na kaja ai ngu hpe zai ladat (idea) hpe tam shapraw nna dai hpe myit lawm ai hte hkaja ra nga ai.
Laika hpaji hpe chyu chyu shakut ai hku mung nram shi ai. manaw manang kaja law law lu hkra, Sara/ma ni hte hku hkau hkra, jawng kaw na hpaji, shinggan kaw na hpa-rat, mahkrum madup ndai ni yawng gaw na a shawng-lam kanbau bungli a matu grai ahkyak nga ai.
Kalang lang tinang a shawng-lam a matu grai shakut ai raitim, sa mayu ai pandung de ndu ai sha kaga nre de rai wa chye nga ai. Dai gaw masha shagu ngu na ram, hkrum katut chye ai shingra tara rai nga ai. Tinang myit da-ting da ai hku, byin mayu ai lam ni hkrak tup nbyin wa ai ten, myit ndaw ai sha, matut na atsam htum shakut ra na re.
Tinang du taw ai shara, nga taw ai madang hpe hkap la myit dik ai hte shawng-lam de shanang sa wa u. Na a shawng-lam hta awngdang ai lam lu ai zawn, hkrat sum ai lam ni mung pru wa na re. Dai ni hpe kaja dik ai hku, hparan let hkawn sa chye na gaw nang hkaja nga ai hpaji hta grau manu dan na nhten.
Myit galu ai hte myit hpe azim sha tawn na mai kaja ai prat hkrun-lam de hkawn sa wa ai shaloi yawng pri-nyem mat wa na re. Karai Kasang jaw ya ai anhte shinggyim masha a prat gaw tsawm htap la nga ai, ngu hpe galoi mung myit dum nga ga.
No comments:
Post a Comment