Mother Teresa a Mungga

1979 ning December 11, Norway Mungdan, Oslo mare kaba kaw Simsa lam hte seng ai kumhpa kaba shagrau hkrum ai shaloi, du sa wa ai shawa masha ni hpe Mother Teresa tsun ai mungga kaw na dang dep ai ram kachyi mi hpe ka da ai.

Daini anhte ndai kaw rau sha, hkrum zup lu ai gaw Karai Kasang a chyeju nan rai nga ai. Hpa majaw nga yang, daini ngai hpe shagrau ai simsa lam hte seng ai kumhpa kaba a marang e, anhte yawng myit hkrum ai hte ndai Mungkan hta ngwipyaw, simsa ai hte rau sha, nga pra sa wa lu na matu anhte hpe kalang bai karum, madi shadaw, shadum chyahprang dat ya ai majaw rai nga ai.

Dai hte maren, Madu Yesu mung matsan mayan ni a matu kabu gara shiga gun sa wa ya ai wa rai nga ai. Hpung shingkang hte hpring ai, Karai Kasang rai tim, awu asin, matsat shabat re yubak mara nkap ai hta lai nna anhte hte maren re shinggyim masha langai sha rai nga lu ai. Anhte a matu kabu gara shiga lawm sa wa ai ngu ai hpe Madu Yesu a mungga ni hta dan dan leng leng mu lu nga ai re.

Ndai Kabu gara shiga gaw myit dingman ai ni yawng hpe myit masin salum, ngwi pyaw, simsa ai lam jaw ya sai. Madu Karai Kasang gaw Mungkan ga hpe grai tsawra ai majaw shi a Kasha shingtai hpe pyi jaw ya sai rai nga ai. Madu Karai Kasang anhte yawng hpe tsawra ai zawn, anhte mung shada da tsawra madi shadaw matsan dum hkat chye na matu hkaw tsun nga ai re.

Ngai gaw Madu Karai Kasang hpe tsawra ai raitim htingbu wa hpe gaw yu nlu nngai nga na tsun taw yang gaw hpring tsup ai lam nrai nga ai. Madu Karai Kasang hpe gaw tsaw ai, htingbu wa hpe gaw, nju taw yang gaw masu ai wa nan rai nga ai. Nmu lu ai Karai Kasang hpe gaw tsawra lu nna, tinang nan mu lu, kanawn mazum taw nga ai htingbu wa hpe gaw hpa majaw ntsaw ra lu a ta?

Bai matut na,