Myen mungdan kaw yu-ma-ya masha langai ja gumhpraw tam na matu nloi la nga ai zawn, Maigan mungdan kaw mung yu-ma-ya masha langai a matu shang gumhpraw kaja ai magam bungli lu na yak dik nga ai. Masha ni nkam galaw ai bungli hpe n-yup nsha, shakut ai hte tinang a n gun lapin law law shapraw jang she lu na, sha na hte tinang a dinghku nta masha ni hpe kachyi mi lu garum, lu jaw ai rai nga ai.
Ndai zawn maigan mungdan hkan tam sha yak la ai hpe Myenmung na nta masha, jinghku jingyu ni nchye tim, maigan mungdan hkan du nga sai ni yawng chyawm gaw tinang nan, mahkrum madup hpe hkam sha lu sai majaw ndai lam hpe hkap la na re ngu kam ai.
Anhte WP sha ni law law wa, maigan mungdan hkan ladat amyu myu hte chyam bra nga saga ai. Maigan mungdan hkan ngu ai hte maren, shara, bungli, shang gumhpraw, lu sha, nga sat nga sa lam, htunghkying, ga, ahkaw ahkang ni mungdan langai hte langai grai shai la nga ai. Nbung ai, shai ai lam ni law law nga ai re majaw yak hkak ai lam ni mung, law la nga ai. Maigan mungdan hkan du wa sai hte gaw yak hkak ai lam ni law law pru wa nga ai.
Hpaji, Hparat, Kan bau bungli lama ma hpe nchye/nsharin da ai maigan de pru sa wa ai ni a matu gaw htam lahkawng grau yak hkak la nga ai. Hpa baw chye galaw ai rai? nga san yang, mahtai nlu jaw ai. Le ra mung loi mi, ndai mung loi mi, gayau gaya loi loi chye nna, gara hpe mung tang du hkra nchye da ai gaw manghkang kaba rai nga ai. Hpa baw magam bungli galaw nni? Hpa kan bau bungli chye galaw nni? ndai ga san ni hpe mahtai atsawm lu jaw na matu shakut da ra nga ga ai.
No comments:
Post a Comment