mahkri sum dut ai wa

Bungli nlu shi ai Brang Ram langai mi gaw bungli lu mayu ai majaw Microsoft Company kaba kaw chyasan chyaseng bungli sa tam yang, Seng ang ai wa gaw shi hpe san thai galaw ai, ngut ai hpang chyasan chyaseng bungli hpe mung ta tut galaw shangun ai da.

Brang Ram wa a galaw ai atsam hpe grai ra mat sai re majaw seng ang ai masha kaba wa gaw,nang grai ram ai, nang hpe bungli jaw sai, nang na email address jaw da u, email kaw nang hpe bungli jaw sai ngu ai laika hte bungli galaw hpang na shani hpe shagun shana dat ya na, ngu tsun ai shaloi,, Brang Ram wa bai nhtang tsun ai gaw, ngai kaw computer mung nlu ai, email mung nchye lang nngai ngu bai htai dat ai da.

Dai shaloi seng ang ai bungli madu wa, bai nhtang tsun ai gaw; daini na aten hta computer mung nlu, email sha mung nchye lang ai wa hpe gaw, anhte ndai mungkan ntsa kaw nga ai ngu pyi nsawn la ga ai, dai majaw ndai mungkan n tsa kaw nnga ai, nang hpe bungli mung gara hku nlu jaw ai, nang wa sanu ngu nna Brang Ram wa hpe wa kau shangun ai da.

Brang Ram wa mung grai myit htum mat ai hte Microsoft Company kaba kaw na pru mat wa sai, shi kaw gumhpraw $ 10 sha lu ai, ndai $ 10 hte shawng lam de gara hku matut hkawm sa wa na,,,? lam hkawm let myit sumru nga yang, malu masha dut ai seng langai hpe mu dat nna, dai kaw na kilo 10 ram re mahkri sum sadek mi mari la nna, nta shagu shang shang pru pru hkan dut ai da, nayi hkum 2 ram na yang dut shama kau sai, shi gumhpraw $ 20 byin wa sai da. Grai kabu ai hte dai shani mahkri sum sadek masum dut kau ai shaloi, gumhpraw 60 lu wa ai da.

Brang Ram wa, shi prat shawng lam hpe gra hku matut hkawn sa na, ngu ai hpe shi loi chye na wa sai, shani shagu mahkri sum sha n ga, malu masha ni hpe mung mari la nna nta shagu hkan dut ai,, jahpawt jau kaw na, shana jan du hkra shakut tik tik rai yang gumhpraw htam hte htam grai law lu wa sai.

Lu ai gumhpraw hte malu masha ni mai htaw dut ai leng langai mi lu mari sai, dai hpang mawdaw ,, mawdaw langai kaw na lahkawng,, 5 ning na ai shaloi US mungdan kaw mying gumhkawng ai, malu masha ni hpe shapraw , htaw dut ai mawdaw law law hpe madu ai bungli madu, lauban kaba byin wa sai da.

Ja gumhpraw law law lu ai lauban rai sai majaw shi a dinghku nta masha ni a shawng lam a matu asak hpe ama-hkam (insurence)galaw mayu ai majaw seng-ang ai ni hpe shaga chyahkrum ai, seng-ang ai ni hte ra ai lam ni chyahta ngut ai shaloi shi hpe matut mahkai na matu email address hpyi ai da, shi email nchye lang ai lam, Computer mung nlu ai lam tsun dan ai shaloi seng-ang ai ni grai mau mat ai hte tsun ai gaw; email mung nchye lang, computer mung nlu ai pyi ndai ram awngdang ai bungli madu byin wa lu ai, lama computer, email mung chye lang ai hte masha shagu hpe matut mahkai ai rai yang, ya na hta htam law law awngdang na re ngu, tsun ai shaloi, Lauban wa loi mi sawn yu nna bai tsun dat ai gaw; ngai lama computer, email chye lang ai rai yang, Microsoft Company kaw chyasan chyaseng galaw ai wa she naw nrai taw nga na, ngu bai htai u ai da,,

Maumwi gaw ndai kaw htum sai. Tsawra ai manaw manang ni e,daini na aten hta mungkan ting email, internet computer lang nga ai rai tim, buga de email, internet, computer ngu ai hpa re pyi nchye ai anhte a manaw manang ni grai nga nga ai, anhte computer ngu ai nlu tim, internet ngu ai hpa re pyi nchye tim, tinang a prat hpe galu kaba wa hkra mahkrun tam nna shakut yang awngdang ai lam, mai lu nga ai ngu ai hpe n gun jaw ai maumwi rai nga ai re.. Buga de na manaw manang ni yawng awngdang ai lam lu la mu ga, galoi mung kyuhpyi myit dum nga let.