'tsawra hte 'sha' ra nbung ai' ndai ga malai hte maren shinggyim masha ni a myit, a myu myu nga ai zawn shanhte kaw rawng ai 'tsawra myit' ni mung langai hte langai shai hkat nga ai. Nkau mi gaw 'tsawra myit' ngu ai hpe n gawn n sawn, a hpa, a tang sha myit la, hkam la ma ai. Nkau mi gaw 'tsawra myit' ngu ai ndai hpe Karai zawn she nawku ma ai.
Asak ram sai shinggyim masha shagu hta 'tsawra myit' ngu ai gaw rawng chyalu rai nga ai. Marai langai ngai tinang hpe tsawra ai, tinang nan kaga masha langai ngai hpe tsawra ai, gara hku mi tsaw tsaw, tsawra ai ngu ai ndai hte shinggyim masha ni kadai mung tawt lai nlu nga ai.
'tsawra myit' ngu ai ndai hpe shinggyim masha ni lachyum shapraw, jai lang ai lam mung langai hte langai nbung hkat nga ai. Manai makai rai hkra tsaw ai, mana hkra tsaw na, si hkra tsaw ai nga nna ya ten na mahkawn ni hta lak lai ai gasi ni na lu nga ai. Nkau mi gaw tinang a prat shawng lam galu kaba na matu tinang a tsawra ai myit hpe manu n shadan ai sha, akyu chya-shawn kau chye nga ai. Nkau mi gaw ndai tsawra myit a matu tinang asak hpe pyi si hkam gwi ai ni mung nga nga ai.
tsawra myit ngu ai ndai ga si hta lachyum grai law/sung nga ai. tsawra myit ngu ai ndai gaw pyaw ngawn ai lam hpe jaw ya lu nga ai, prat a matu shinglum ai lam hpe mung jaw ya nga ai, lu la mayu ai myit, madu mayu ai myit hpe mung byin shangun nga ai. Kalang lang ndai tsawra myit ngu ai gaw hkrit na zawn rai hkra masha hpe chye zingri nga ai, yawn hkyen ai lam hpe mung shabyin ya lu nga ai.
Tinang tsawra ai wa a ra sharawng ai lam shagu hpe chyahpring shatsup ya mayu taw nga ai, shi hpe pyaw ngawn ai lam ni ten shagu jaw mayu taw ai, shinglum ai lam hpe mung jaw mayu ai, tsawra ai myit ngu ndai atsam, marai grai kaba la nga ai law.
Tinang nan, masha langai ngai kaw na tsawra ai lam hpe lu la ai shaloi, dai wa hpe dang sha mayu ai, roi sha mayu ai, ntsa kaw na kanawn ai, kajet, kajat nga nna tsun shaga ai, tinang lu la ai dai 'tsawra' ai lam hpe manu n shadan ai, nhkung ga ai, n gawn nsawn galaw kau ai, dai zawn re masha ni gaw hpang chyahtum myit malai lu ai hte ngam taw chye nga ma ai.
Kalang lang tsawra ai hte ngang kayut ai lam hpe garan, ging-hka na matu grai yak la nga ai. Gawng shingyan tsawm htap la ai NUM sha snr LA sha hpe mu dat ai shaloi masin salum htuk-htak wa ai. dai masin salum htuk-htak ai hpe tsawra ai ngu nna tsun na matu nmai nga ai. Dai gaw ngang kayut ai lam sha rai nga ai. Ndai hpe atsawm nchye ging-hka, hparan kau ai majaw yak-hkat, jamjau la ai tsaw hkrun lam hpe nkam tim shakut hkawm sa ra taw ai masha ni ndai mungkan ntsa hta law la nga ai.
Jet ai 'tsawra' myit gaw nang grau ai, ngai sum ai, nga nna ntsun ai. Tinang a majaw snr tinang madi shadaw karum ya ai a majaw pri nyem mat wa ai hpe yu nna myit hta kabu myit dik, myit pyaw ai. Jet ai 'tsawra' myit gaw hkam sharang, shagrip shanyem, myit galu ai hte tsawra chye nga ai. Jet ai 'tsawra' myit gaw jaw ya lu ai. hkam la ai lam nnga tim, jaw ya taw ai hpe myit dik myit pyaw nga ai.
Marai langai ngai hpe tsawra hkrup sai wa gaw ten shagu pyaw taw nga ai, myit rawt, zet let nga ai. Ndai ten hta shi pyaw nga ai hpe makau grup yin na masha ni pyi maram lu nga ai. 'tsawra' ai myit ngu ndai n gun, atsam kaba la nga ai.
Jet ai 'tsawra' myit gaw hpang jahtum aungdang ai lam hpe lu la ai nga tim, tinang hpe n tsawra ai wa kaw na 'tsawra' myit hpe lu la na matu la dingda nga ai gaw myit htum, myit daw hpa rai nga ai. Tinang hpe n tsawra ai ni a matu aten ahkying shama taw nga na malai tinang a prat hkrun lam / shawng lam rawt jat galu kaba wa na matu ladat shaw shakut shaja sa wa na gaw grau mai kaja nga ai law.
No comments:
Post a Comment