'nang' teng sha internet lang ai 'yin' kap taw sai kun?

Daini na prat hta shinggyim masha kaji kaba yawng a lapran e internet ngu ai arai ndai gaw shani shagu nlang nmai ai 'rai' langai mi byin wa sai.

Internet gaw laika hpaji, hparat hkaja ai lam, matut mahkai lam ni a matu akyu rawng ai hta sha n ga, shangwi shapyaw ai lam hta mung mai lang ai a majaw lang ai masha lani hte lani grau grau law wa nga ai. Computer shawng kaw aten law law shama ai gaw hkum hkrang hte myit masa lam ni a matu nkaja nga ai.

Internet hpe shalai shajan lang ai gaw ana zinli zawn rai wa nga ai hpe mu lu wa sai. Ya daini na aten hta US mungdan kaw internet hpe shalai shajan lang ai ana zinli hpe tsi tsi lajang ya na matu tsi-gawk hpe pyi hpaw hpang dat masai da.

Tinang kaw internet 'yin' snr ana zinli kap nkap hpe maram mai ai nsam (11) hpe npu kaw mu lu na re.

1. Internet lang ai ten law htam wa ai.
2. Tinang a shani shagu na nga-sat nga-sa lam ni galai shai wa ai.
3. Internet lang taw ai hpe grai pyaw, grai myit dik dum taw ai.
4. Ten shagu internet chyu lang mayu ai myit rawng taw nga ai, nlu lang yang yup n pyaw, sha nmu, myit nji nmu byin taw nga ai.
5. Dum nta masha ni hte jinghku, manaw manang ni hpe nkaw mat wa ai.
6. Tinang internet lang ai hte seng nna kaga masha ni hpe masu tsun chye wa ai.
7. Bungli, jawng ni hte seng ai lam ni hta kang nka wa ai.
8. Tinang a hkum hpe tinang mara lu ai zawn nga hkam sha wa nna, tinang galaw da ai lam ni hpe tinang myit n pyaw ai zawn nga nna hkam sha wa ai.
9. Yup ai aten ni galai shai wa ai.
10. Hpum wa ai, nchyang machyi, baw machyi, hkri-hkraw ni mahkret machyi ai lam ni byin wa ai.
11. Uhpung uhpawng hte chyawm galaw ra ai lam ni hta nlu shang lawm mat wa ai.