TSIN YAM HTE GRAU AI PRAT HKRUNLAM DE

Myen Mungdan kaw galaw lu galaw sha yak, ahkaw ahkang nnga, hpaji lam hte seng nna mung shawnglam nnga ai. Ndai mayak mahkak ni kaw na tawt lai lu na matu anhte w/p sha ni maigan mungdan de lam amyu myu hte shakut pru sa wa ai hta tsin yam hku nna sa ai mung mahkrun myu mi rai nga ai.

Nkau mi gaw Tsin Yam hku nna shingbyi shara tam ai gaw anhte w/p sha ni a matu nhtuk ai, anhte w/p amyu sha ni gaw amyu kaba re. Maigan sa tim, kaga lam hku she shakut na. Tsin yam hku gaw nkam sa ai nga nna tsun ai ni mung law law rai nga ga ai. Dai hku tsun ai ni hpe mung mara nmu nngai. shanhte tsun ai jaw nga ai. rai mung rai nga ga ai. Mai byin yang gaw maigan de jawngma hku snr bungli hte tara shang lu sa yang gaw kaja dik rai na re.

Ngai maigan sa na matu nnan hkyen lajang wa ai ten, manang makau mi tsin yam hku galaw ai hpe ngai mung nhkap la nngai. Dai majaw Maigan de tara shang lu sa na matu grai shakut lai wa sai re. Kade shakut tim n awng dang ai hta n ga, lu ai gumhpraw hte manu dan la ai aten ladaw ni law law mung htum mat sai hku re.

Tsin Yam hku nna shakut shaja ai manaw manang ni gaw aten na wa ai hte maren, shanhte a masa lam ni mung lani hte lani grau grau pri nyem wa ai hpe mu mada lu nngai.

Dai majaw ja gumhpraw n gun atsam nga ai ni ndai lam hpe myit yu ging nga ai. Tinang nan nsa tim, tinang a nta masha, jinghku ni hpe lam tam ya ga. Tsin yam hku nna maigan de sa ai hpe ngai hku nna gaw n-gun jaw ai. Hpa majaw nga yang anhte a hpu nau ni rai nga ai HKANG, KAYIN ni gaw ndai de n gun grai dat ai hku re.

Tsin Yam! Tsin Yam! 'Tsin yam' nga ai hte maren, Maigan Mungdan hkan Tsin Yam sa hkam ai mung loi gaw nloi nga ai. Shagri brep hkam sha ai lam ni gaw nga ai hku re.

Loi Loi hte awngdang ai lam lu la na matu daini na Mungkan ntsa hta hpa nnga sai. Aten jaw ra ai. Hkam sharang ra ai. Myit galu ra ai. Tinang a Mungdan nre majaw yak hkak ai lam ni grai nga na nhten, raitim dai hpe myit let hkrit taw nga yang gaw lam shagu hta hpang hkrat wa na re. Dai majaw Myenmung dan kaw mau dung taw nga na aten shama kau na malai, mai byin ai hku nna lam tam shakut sa wa ga ngu saw shaga mayu ai.