Tsawra dik ai Nu

Ma e,,! Rawt sanu,, Jawng sa hpang hkrat wa nga ai,,, Nu jasu ai nsen a majaw,dum wa na, shakum ntsa kaw na, dingsa la ai nayi hpe yu let,,, Hpa majaw ya she jasu ai rai! jawng hpang hkrat sai,,, grai pawt mayu ai law ngu,,, aput angun ai hte jawng sa na matu atin shapun hkyen la nngai.

Yawng hkyen ngut na nta kaw na pru wa yang Nu a nsen hpe na dat nngai. Ma e,,! Nu hpe hkum pawt yaw,, Nu hkum n pyaw na she re. Nu a nsen na ai hte ,, ngai mung myit n galu ai nsen hte, bai machyi sai i? nau machyi ja la ndai ngu marawn kajet let, kayin yu dat yang, Nu gaw ngai hpe grai agam ai nsam hte tsun ai"Ma hpe jau jau n'jasu ai, Nu a mara hpe raw dat ya rit, nga hpyi nyem let,,, Ndai 'Ma'a matu shani shat, nga nna shat makai jaw ai. Nu jaw ai shat makai hpe nkam sha sai ngu marawn tsun let kabai ayai kau na, jawng de sa mat wa nngai. Lam kaw na bai nhtang yu dat yu yang Nu a hkum n pyaw ai myi-man nsam hpe mu dat ai rai tim, ten shagu machyi ja ai Nu hpe myit n tsang ai sha jawng de sa mat wa nngai.

Jawng kaw du ai shaloi shiga na lu ai gaw, ndai bat 6 ya shani jawng ma ni pyaw-poi hkrun-lam kadun langai hkawm na masing nga ai lam na lu ai.Ngai mung grai sa mayu nngai.Manaw manang ni hte rau wam hkawm let, matsan la ai nye prat hpe chyahkring sha pyi, malap kau mayu nngai. Ten shagu machyi nna yupra kaw taw nga ai Nu hpe malap kau nna manaw manang ni hte wam dam pyaw hkawm mayu nngai.

Jawng yu na nta de bai du wa ai ten, shawoi na hte maren yupra kaw machyi taw nga ai Nu hpe mu lu yang myit hta pawt mayu wa ai lam ni bai pru wa sai. Nu gaw jawng na bai wa ai ngai hpe mani sum sai hte 'Ma e... Jawng na bai wa sani? nga nna hkap san ai hpe nhtai ai sha,,,,

Nu,,, Ndai bat 6 ya shani jawng kaw na manang ni hte pyaw-poi hkrunlam kadun langai hkawm mayu ai,,sa na yaw! pyaw-poi Hkrunlam da aw,,Ma,, gumhpraw kade ting, ma na rai? Nu gaw hkrunlam hkawm yang kade ma na hpe shawng san taw nga ai. Yak hkak la ai nta na lam ni a majaw, dai de sa na, nsa na hpe ung-ang let,, mun 8 ngu,, htai dat nngai. Ngai na mahtai hpe na jang Nu gaw mun 8 ting da aw,, nga na bai san ai. Ngai mung mun 8 sha pyi nlu ai i! ngu,, bai marawn kajet ai hte, bai san dat nngai.

Ngai ndai zawn rai matsan ai prat hpe grai nju nngai. Masha ni zawn zawn nlu nga ai, nye prat hpe sumru dat shagu, grai myit daw, myit kaji hkam sha nngai. Nu hpe mung nju ai. Nu gaw nsa kaba sa let, bungmhkum npu na bank laika buk hpe la nna, ndai lani mi kachyi chyi mahkawng da ai gumhpraw re, mun 8 shaw lang u. prat tup, kalang mi pyi nmu ga ai bank laika buk hpe yu let,, mani sum sai hte,, ga hkaw mi pyi nshaga sai sha, myu de gat sa mat wa nngai.

Bank laika buk hpe yu dat yang sen 10 ting rawng taw ai hpe mu lu ai. (korea gumhpraw gaw Myen Kyat zawn grai manu hkrat ai) Ngai na matu gaw grai law la ai gumhpraw rai nga ai. Daini du hkra, ndai gumhpraw hpe hpa majaw nlang ai kun! ngu myit let, Hkrun-lam a matu mun 8 hpe shaw la nngai. Bank kaw sen 9 a mun 2 naw ngam ai. Ndai ram ting naw ngam ai naw kahtap lang tim hpa nra na re ngu, bai myit la let,, Ndai ten hta masha shagu lata phone lang tim, ngai kaw phone nnga ai hpe myit dum let,, phone langai mari na matu, myit lu wa na, bank kaw gumhpraw sen 4 bai shaw la nna hpang jahtum pru ai phone nnan langai mari la kau nngai.

Grai pyaw mat sai. prat tup nlu lang ga ai lu lang ai majaw grai pyaw let,, myu hkan hkawm chyai yang, tsawm htap, prat dip la ai labu hpun palawng seng ni hpe mu ai hte mari mayu ai myit ni katu pru wa ai hte bank de bai gat sa let sen 2 bai shaw la ai. Labu palawng law dik mari la kau nna, langai hpang langai hpun chyam yu na, Pat kaw yu dat yang grai myit dik la nngai.

Myit ndik ai lam langai gaw nga ai. Nu zen ya ai kara mala la, ntsawm la ai hpe mu ai majaw, kara zen na matu mun 5 bai shaw la nna, prat dip kara zen seng kaw kara sa zen kau dat yang, tsawm htap la ai ngai wa le i! ngu myit pyaw dik let,,, hkrun-lam hkawm na matu, ra ai rai ni yawng mari la ngut ai hpang gumhpraw gaw mun 9 sha ngam sai. Ngai mung masha ni zawn lu hpun, lu lang sai ngu grai myit pyaw mat nngai. Ra ai lam ni yawng mari la ngut ai hpang,,, myitru, myit htum, lam ni hte hpring chyat nga ai nta de bai nhtang wa sai.

Nta du yang Nu yup pyaw taw nga ai hpe mu nngai. Nu ndum yang dum hkra nsen shapraw dat nngai. Ngai na nsen na jang,, Nu dum wa ai. Nu hpe bank laika buk bai nhtang jaw yang, Nu gaw gumhpraw kade naw ngam ai pyi n-yu sai sha, bunghkum npu de bai bang kau dat ai.

Shingrai, la dingda taw ai 6 ya shani du wa sai. 2 na yup 3 ya hkrun-lam hpe manaw manang ni hte pyaw hkawm lu nngai. Ndai laman matsan la ai prat hte, ten shagu hkum n pyaw machyi nga ai Nu hpe chyahkring mi malap da let, pyaw dik ai hku aten hpe shalai lu nngai. Kaja wa nan pyaw dik la ai ten ladaw ni hpe lu la ai hku re.

Pyaw ngawn la ai aten, ladaw ni grai lawan ai hku ma mat sai. Myit ru, myit daw ai lam ni hte hpring chyat nga ai nta de bai wa ra sai ngu ai, myit ni hte rau, nkam wa dik ai nta de bai du wa nngai. Nta du ai hte rau,, A,,Nu,,, Ma bai wa sai ngu,, marawn, chyahtau dat ai rai tim,,,Nta kaw mau na zawn,,, katsi katsang byin taw nga ai.

Matut na, A,,Nu,, Ma bai wa sai le, ngu matut shaga tim, hpa nsen nna lu ai majaw, ngai grai myit kadun wa nngai. Pawt mayu ai myit hte, Nu a yup gawk chyinghka hpe aja wa, hpaw dat yu yang,,yup ra kaw galeng taw nga ai Nu hpe mu dat nngai. Ngai nta wa ai ten shagu hta, mani sum sai hte hkap tau la ai Nu,,, daini gaw ga nshaga mat sai. Ngai gumhpraw law dik hkra lang kau ai majaw Nu pawt taw sam ai ngu na myit la let, Nu hpe chyasu ashun dat ai shaloi,, Nu a hkum ni katsi katsang byin taw ai hpe chye lu nngai.

Salum hkring mat na zawn nga hkra kajawng mat nye ai. Myiprwi si ni mung shi hte shi lwi hkat wa ai hte rau,, ngai nju la ai Nu ndai zawn katsi taw ai hpe mu lu ai shaloi, grai yawn mat nngai. Nu ndai zawn byin mat ai hpe mung nkam nngai. Dai majaw Nu hpe kalang mi bai aging agang chyasu yu nngai. Kade chyasu tim, Nu gaw ndum mat sai. Bunghkum npu na bank laika buk hpe la nna, Nu hpe mung ahpum let,, Ma,,ya hpang de ndai zawn n'galaw na se ai. Galoi mung n'galaw na sai ngu tawng ban ai hte hkrap nga nngai. Dai shaloi bank laika buk kaw na laika langai hkrat wa ai. Dai hpe n'gwi dik ai hte sha, hpaw hti dat yu yang,,

'Nu' tsawra dik ai 'Ma' hti na matu laika

Ma e,, Nu hpe grai nju taw nga ai i rai,,?
Matsan la ai prat hpe mung, si na ram nju ai nre i?
Nu grai hpyi nyem ai yaw, Nu hpe mara raw ya rit..
Nu gaw hpaji mung nchye, ja, gumhpraw mung nlu ai..
Nu a kasha hpe jaw na matu,, Nu a tsawra myit hta lai na, Kaga hpa mung nlu ai wa re.
Nu,,ya na zawn Ma hpe hkrai tawn kau da ra ai majaw Nu grai myit npyaw nngai.
Nu,,ana byin ai majaw Ma hpe ndai zawn tawn da ra ai re.
Teng sha nga yang, ndai ana gaw tsirung kaw, ga, lajang hkam la yang mai tsai lu ai da. Rai tim hkrat ang ai gumhpraw gaw grai law ai.
Nu myit ai, lama Nu ga lajang ai lam n'glaw yang Nu kasha, ra ai lu mari, ra ai hku mai lang ai majaw, ga lajang ai lam hpe n'galaw na matu myit daw dan kau ai re.
Ma e,, ten ladaw ni na wa ai hte rau, Nu kaw byin ai ana gaw grau grau sawng wa ai. Ya gaw Ma hpe hkrai tawn kau da ra sai. Ma a matu hpa lachyum npru akyu nrawng ai Nu hpe Nu nga nna hkap la ya ai majaw grai chyeju kaba ai.
Ndai mungkan hta Ma hpe sha, Nu,,tsawra dik ai ngu hpe Ma chye na re.
Nu a bunghkum npu kaw atsawm tam yu u. bank laika buk langai mu lu na ra ai. Nu shaning law law mahkawng da ai gumhpraw ni re.
Sen 200 ram rai na re. Ma matsan mayai rai nnga ra na sai.
Ma hpe tsawra dik ai, Nu.

Ndai laika hpe hti ngut ai hte ngai na hkum hpe ngai grai nju wa nngai. Nu hpe nju ai hta htam hkying, mun n'ga ngai na hkum ngai, grai nju mat nye ai. Ma lang kau ai gumhpraw ni gaw Nu a tsi tsi na matu gumhpraw ni,,,,tsi tsi na gumhpraw ni,,, Nu e,, hpa majaw Ma hpe ntsun ai law. Nu a tsawra myit hpe dai ram nchye na ai Ma hpe hpa majaw dai ram tsawra ai law.

Ya kaw na gaw jawng sa na matu chyasu ai Nu a nsen hpe mung nna lu na sai. Nu lajang ya ai shani shat mung nlu sha sai. Yup ra kaw kaleng taw nga ai Nu hpe mung nmu lu na sai ngu ai myit ni hte hkrap taw nga nngai. Nu hpe kalang mi pyi njaw ga ai Ma a tsawra myit hpe mung jaw mayu nngai.

Nu hpe kalang mi pyi ntsun ga ai, ga hkaw langai hpe myit dum wa ai. Myit dum wa ai hte rau Nu hpe azi yu let,, Nu,, Ma mung Nu hpe grai tsawra nngai.

Mungkan ting na, Kanu ni yawng gaw, kasha ni hpe shanhte a asak hta pyi grau na, tsawra ai ngu ai hpe yawng, myit dum nga na matu ndai laika hpe tang madun dat nngai.. Korea sumrai re.